KHush-talai mein shams o qamar donon ek hain

ḳhush-tāla.ī meñ shams o qamar donoñ ek haiñ

din raat kā to farq hai par donoñ ek haiñ

ḳhvāhī meñ ro.uuñ laḳht-e-jigar ḳhvāh ashk sirf

āñkhoñ meñ merī la.al-o-gohar donoñ ek haiñ

dījūr meñ kise hai sapīd o siyah kā farq

zindāniyoñ ko shaam o sahar donoñ ek haiñ

kahne ko garche haath judā haiñ mire vale

hone ko us kā tauq o kamar donoñ ek haiñ

ḳhvāhī tū chashm-e-chup se dar aa ḳhvāh raast hai

aane ko ghar meñ dil ke ye dar donoñ ek haiñ

jo qulzum-e-fanā kā musāfir huā use

bād-e-murād o mauj-e-ḳhatar donoñ ek haiñ

maiñ jal rahā huuñ un ke to hāthoñ se kuchh na pūchh

ai 'mus.hafī' ye dīda-e-tar donoñ ek haiñ

KHush-talai mein shams o qamar donon ek hain

din raat ka to farq hai par donon ek hain

KHwahi mein roun laKHt-e-jigar KHwah ashk sirf

aankhon mein meri lal-o-gohar donon ek hain

dijur mein kise hai sapid o siyah ka farq

zindaniyon ko sham o sahar donon ek hain

kahne ko garche hath juda hain mere wale

hone ko us ka tauq o kamar donon ek hain

KHwahi tu chashm-e-chup se dar aa KHwah rast hai

aane ko ghar mein dil ke ye dar donon ek hain

jo qulzum-e-fana ka musafir hua use

baad-e-murad o mauj-e-KHatar donon ek hain

main jal raha hun un ke to hathon se kuchh na puchh

ai 'mushafi' ye dida-e-tar donon ek hain