KHusha bedad KHun-e-hasrat-e-bedad hota hai

ḳhushā bedād ḳhūn-e-hasrat-e-bedād hotā hai

sitam ījād karte ho karam ījād hotā hai

ba-zāhir kuchh nahīñ kahte magar irshād hotā hai

ham us ke haiñ jo ham par har tarah barbād hotā hai

mire nāshād rahne par vo jab nāshād hotā hai

batā.ūñ kyā jo merā ālam-e-fariyād hotā hai

yahī hai rāz-e-āzādī jahāñ tak yaad hotā hai

ki nazreñ qaid hotī haiñ to dil āzād hotā hai

dil-e-āshiq bhī kyā majmua-e-azdād hotā hai

udhar ābād hotā hai idhar barbād hotā hai

vo har ik vāqi.a jo sūrat-e-uftād hotā hai

kabhī pahle bhī dekhā thā kuchh aisā yaad hotā hai

baḌī mushkil se paidā ek vo ādam-zād hotā hai

jo ḳhud āzād jis kā har nafas āzād hotā hai

nigāheñ kyā ki pahroñ dil bhī vāqif ho nahīñ saktā

zabān-e-husn se aisā bhī kuchh irshād hotā hai

tumhīñ ho ta.ana-zan mujh par tumhīñ insāf se kah do

koī apnī ḳhushī se ḳhānamāñ-barbād hotā hai

ye maanā nañg-e-pābandī se kyā āzād ko matlab

magar vo sharm-e-āzādī se bhī āzād hotā hai

tasavvur meñ hai kuchh aisā tirī tasvīr kā aalam

ki jaise ab lab-e-nāzuk se kuchh irshād hotā hai

koī had hī nahīñ shāyad mohabbat ke fasāne kī

sunātā jā rahā hai jis ko jitnā yaad hotā hai

KHusha bedad KHun-e-hasrat-e-bedad hota hai

sitam ijad karte ho karam ijad hota hai

ba-zahir kuchh nahin kahte magar irshad hota hai

hum us ke hain jo hum par har tarah barbaad hota hai

mere nashad rahne par wo jab nashad hota hai

bataun kya jo mera aalam-e-fariyaad hota hai

yahi hai raaz-e-azadi jahan tak yaad hota hai

ki nazren qaid hoti hain to dil aazad hota hai

dil-e-ashiq bhi kya majmua-e-azdad hota hai

udhar aabaad hota hai idhar barbaad hota hai

wo har ek waqia jo surat-e-uftad hota hai

kabhi pahle bhi dekha tha kuchh aisa yaad hota hai

baDi mushkil se paida ek wo aadam-zad hota hai

jo KHud aazad jis ka har nafas aazad hota hai

nigahen kya ki pahron dil bhi waqif ho nahin sakta

zaban-e-husn se aisa bhi kuchh irshad hota hai

tumhin ho tana-zan mujh par tumhin insaf se kah do

koi apni KHushi se KHanaman-barbaad hota hai

ye mana nang-e-pabandi se kya aazad ko matlab

magar wo sharm-e-azadi se bhi aazad hota hai

tasawwur mein hai kuchh aisa teri taswir ka aalam

ki jaise ab lab-e-nazuk se kuchh irshad hota hai

koi had hi nahin shayad mohabbat ke fasane ki

sunata ja raha hai jis ko jitna yaad hota hai