KHusha-nasib haqiqat ye dil ne mani hai

ḳhushā-nasīb haqīqat ye dil ne maanī hai

hayāt ham ko batānī nahīñ banānī hai

rakhe bhī koī to kyūñkar ta.alluq-e-ḳhātir

maiñ ik jazīra mire ird-gird paanī hai

ye kyā ki raa.ī kā parbat banā diyā tum ne

hamārā dil to havādis kī rājdhānī hai

hamārī piiTh meñ ḳhanjar utārne vaale

sitam kī tarz badal de bahut purānī hai

bahut se ahl-e-zabāñ be-zabān jaise haiñ

bahut se gūñgoñ ko zo.am-e-zabān-dānī hai

'amīn'-e-sozish-e-ishq-e-habīb haiñ donoñ

ai sham.a terī mirī ek hī kahānī hai

KHusha-nasib haqiqat ye dil ne mani hai

hayat hum ko batani nahin banani hai

rakhe bhi koi to kyunkar talluq-e-KHatir

main ek jazira mere ird-gird pani hai

ye kya ki rai ka parbat bana diya tum ne

hamara dil to hawadis ki rajdhani hai

hamari piTh mein KHanjar utarne wale

sitam ki tarz badal de bahut purani hai

bahut se ahl-e-zaban be-zaban jaise hain

bahut se gungon ko zoam-e-zaban-dani hai

'amin'-e-sozish-e-ishq-e-habib hain donon

ai shama teri meri ek hi kahani hai