KHusha-qismat wo aae hain to aise mein dua jage

ḳhushā-qismat vo aa.e haiñ to aise meñ duā jaage

ghaTā barse uThe sāġhar nizām-e-mai-kada jaage

ḳhumār-ālūda āñkheñ surḳh chehra muntashir zulfeñ

vo kyā jaage ki fitrat ke nuqūsh-e-fitna-zā jaage

nahīñ TuuTā abhī pindār zohd-o-ittiqā shāyad

koī sāġhar-ba-kaf jādū-nazar kāfir-adā jaage

hameñ to dekhnā ye hai giregī tab kahāñ bijlī

vo jab añgḌā.ī le kar uTTheñ aur band-e-qabā jaage

mahak kaliyoñ kī phūloñ kā tabassum maañd ho pal meñ

kisī kī zulf ko chhū kar agar bād-e-sabā jaage

kabhī aisā bhī lamha kaash aa jaa.e mohabbat meñ

hamārī ḳhvāhisheñ so jaa.eñ un kā mudda.ā jaage

rahīn-e-ḳhvāb haiñ dair-o-haram ke pāsbāñ ab tak

ye mumkin hai ki rindo mai-kade meñ ab ḳhudā jaage

ye sote haiñ to sone do na chheḌo in ko farzāno

bisāt-e-hosh ulaT deñge jo dīvāne ḳhudā jaage

nizām-e-bahr-o-bar jis ne badal Daalā thā duniyā kā

vahī takbīr phir gūñje vahī dast-e-duā jaage

sukūt-e-mustaqil qismat na ban jaa.e samundar kī

koī tūfān phir uTThe koī mauj-e-balā jaage

abhī se fikr kyoñ radd-e-amal kī 'fauq' karte ho

jafā.eñ aur baḌhne do ki dil kā hausla jaage

KHusha-qismat wo aae hain to aise mein dua jage

ghaTa barse uThe saghar nizam-e-mai-kada jage

KHumar-aluda aankhen surKH chehra muntashir zulfen

wo kya jage ki fitrat ke nuqush-e-fitna-za jage

nahin TuTa abhi pindar zohd-o-ittiqa shayad

koi saghar-ba-kaf jadu-nazar kafir-ada jage

hamein to dekhna ye hai giregi tab kahan bijli

wo jab angDai le kar uTThen aur band-e-qaba jage

mahak kaliyon ki phulon ka tabassum mand ho pal mein

kisi ki zulf ko chhu kar agar baad-e-saba jage

kabhi aisa bhi lamha kash aa jae mohabbat mein

hamari KHwahishen so jaen un ka muddaa jage

rahin-e-KHwab hain dair-o-haram ke pasban ab tak

ye mumkin hai ki rindo mai-kade mein ab KHuda jage

ye sote hain to sone do na chheDo in ko farzano

bisat-e-hosh ulaT denge jo diwane KHuda jage

nizam-e-bahr-o-bar jis ne badal Dala tha duniya ka

wahi takbir phir gunje wahi dast-e-dua jage

sukut-e-mustaqil qismat na ban jae samundar ki

koi tufan phir uTThe koi mauj-e-bala jage

abhi se fikr kyon radd-e-amal ki 'fauq' karte ho

jafaen aur baDhne do ki dil ka hausla jage