KHusha wo bagh mahakti ho jis mein bu teri

ḳhushā vo baaġh mahaktī ho jis meñ bū terī

ḳhushā vo dasht ki ho jis meñ justujū terī

ḳhamosh hai magar ik ālam-e-takallum hai

laboñ pe ġhunche ke goyā hai guftugū terī

jigar bhī chaak huā dil bhī pāra-pāra huā

lagī huī hai magar dil se aarzū terī

muqābil ruḳh-e-zebā na honā ai gul-e-tar

kahīñ na ḳhaak meñ mil jaa.e aabrū terī

asīr-e-sahn-e-gulistāñ nahīñ dil-ārā.ī

shamīm-e-lutf dil-afzā hai kū-ba-kū terī

tarīq-e-ahl-e-nazar meñ hai man.a yaksūī

zi-bas-ki jalva-firozī hai chār-sū terī

hanūz dasht-e-ḳhutan nāfa-zār-e-ālam hai

kabhī khulī thī udhar zulf-e-mushk-bū terī

farishta-e-ajal aa.e parī ke qālib meñ

ba-vaqt-e-marg jo sūrat ho rū-ba-rū terī

umīd-e-lutf pe 'hasrat' hai bāġh-e-rizvāñ meñ

sunā hai jab se ki lutf-o-karam hai ḳhū terī

KHusha wo bagh mahakti ho jis mein bu teri

KHusha wo dasht ki ho jis mein justuju teri

KHamosh hai magar ek aalam-e-takallum hai

labon pe ghunche ke goya hai guftugu teri

jigar bhi chaak hua dil bhi para-para hua

lagi hui hai magar dil se aarzu teri

muqabil ruKH-e-zeba na hona ai gul-e-tar

kahin na KHak mein mil jae aabru teri

asir-e-sahn-e-gulistan nahin dil-arai

shamim-e-lutf dil-afza hai ku-ba-ku teri

tariq-e-ahl-e-nazar mein hai mana yaksui

zi-bas-ki jalwa-firozi hai chaar-su teri

hanuz dasht-e-KHutan nafa-zar-e-alam hai

kabhi khuli thi udhar zulf-e-mushk-bu teri

farishta-e-ajal aae pari ke qalib mein

ba-waqt-e-marg jo surat ho ru-ba-ru teri

umid-e-lutf pe 'hasrat' hai bagh-e-rizwan mein

suna hai jab se ki lutf-o-karam hai KHu teri