KHushamad kar ke wo pahron kabhi mujhko manata hai

ḳhushāmad kar ke vo pahroñ kabhī mujh ko manātā hai

use merī tarah se chāhne kā Dhañg aatā hai

jahān-e-husn kī ra.anā.iyoñ meñ shauq kā aalam

sharārat jab bhī dil kartā hai dilbar muskurātā hai

ba-sad lutf-o-karam le kar mujhe jaatā hai dariyā tak

Dubo kar mujh ko ḳhud bhī vo usī meñ Duub jaatā hai

ba-vaqt-e-ḳhās mujh ko munkashif kartā hai vo mujh par

vo apnī shān-e-yaktā.ī kā jalva yuuñ dikhātā hai

lakīreñ mere hāthoñ kī yakāyak jagmagātī haiñ

mire hāthoñ meñ jis lamha tumhārā haath aatā hai

mujhe is qism kī koī shikāyat hī nahīñ us se

jalātā hai kuḌhātā hai satātā hai rulātā hai

yahī qissa hai maut-o-zindagī kā ai mire hamdam

koī apnī adā.eñ dil-rubā ke ruḳh dikhātā hai

'suhail' is tarah likhtā hai vo ḳhud-ārā.ī kā qissa

vo apnā naam likh kar phir tumhārā naam laatā hai

KHushamad kar ke wo pahron kabhi mujh ko manata hai

use meri tarah se chahne ka Dhang aata hai

jahan-e-husn ki ranaiyon mein shauq ka aalam

shararat jab bhi dil karta hai dilbar muskuraata hai

ba-sad lutf-o-karam le kar mujhe jata hai dariya tak

Dubo kar mujh ko KHud bhi wo usi mein Dub jata hai

ba-waqt-e-KHas mujh ko munkashif karta hai wo mujh par

wo apni shan-e-yaktai ka jalwa yun dikhata hai

lakiren mere hathon ki yakayak jagmagati hain

mere hathon mein jis lamha tumhaara hath aata hai

mujhe is qism ki koi shikayat hi nahin us se

jalata hai kuDhata hai satata hai rulata hai

yahi qissa hai maut-o-zindagi ka ai mere hamdam

koi apni adaen dil-ruba ke ruKH dikhata hai

'suhail' is tarah likhta hai wo KHud-arai ka qissa

wo apna nam likh kar phir tumhaara nam lata hai