خوشبو دھنک ستارے اچانک ہوا ہوئے

خوشبو دھنک ستارے اچانک ہوا ہوئے

روشن ضمیر لوگ خدا جانے کیا ہوئے

ساحل بھنور افق کے کناروں سے دور اب

کتنے نئے جہان نگاہوں میں وا ہوئے

احساس تیز دھوپ سا صحرا سی زندگی

رنج و الم سزا نہ ہوئے ہم نوا ہوئے

بدلا ہے کس نگاہ نے ماحول اس طرح

پتھر بھی اپنے شہر کے سب آئنہ ہوئے

آواز حق سے خالی ہوا شہر دلبراں

جب سے ہمارے لب بھی یہاں بے صدا ہوئے

آئے نہ لوٹ کر وہ کبھی زندگی میں پھر

جو لمحے زندگی سے ہماری خفا ہوئے

لب سے نکل گئی تھی صداقت کی کوئی بات

اپنے پرائے ہم سے یہاں سب خفا ہوئے

لکھا ہتھیلیوں پہ چمن نے یہ حادثہ

رنگ شفق میں ڈوب کے برگ حنا ہوئے

پھر چھوڑتے نشان کہاں زندگی کے ہم

جب خواہشوں کے دشت میں خود گرد پا ہوئے

گر کر بلندیوں سے نہ اٹھا کوئی نظرؔ

یوں تو انا میں ڈوب کے کتنے خدا ہوئے