KHushbu dhanak sitare achanak hawa hue

ḳhushbū dhanak sitāre achānak havā hue

raushan zamīr log ḳhudā jaane kyā hue

sāhil bhañvar ufuq ke kināroñ se duur ab

kitne na.e jahān nigāhoñ meñ vā hue

ehsās tez dhuup sā sahrā sī zindagī

ranj-o-alam sazā na hue ham-navā hue

badlā hai kis nigāh ne māhaul is tarah

patthar bhī apne shahr ke sab aa.ina hue

āvāz-e-haq se ḳhālī huā shahr-e-dil-barāñ

jab se hamāre lab bhī yahāñ be-sadā hue

aa.e na lauT kar vo kabhī zindagī meñ phir

jo lamhe zindagī se hamārī ḳhafā hue

lab se nikal ga.ī thī sadāqat kī koī baat

apne parā.e ham se yahāñ sab ḳhafā hue

likkhā hatheliyoñ pe chaman ne ye hādisa

rang-e-shafaq meñ Duub ke barg-e-hinā hue

phir chhoḌte nishān kahāñ zindagī ke ham

jab ḳhvāhishoñ ke dasht meñ ḳhud gard-e-pā hue

gir kar bulandiyoñ se na uThThā koī 'nazar'

yuuñ to anā meñ duub ke kitne ḳhudā hue

KHushbu dhanak sitare achanak hawa hue

raushan zamir log KHuda jaane kya hue

sahil bhanwar ufuq ke kinaron se dur ab

kitne nae jahan nigahon mein wa hue

ehsas tez dhup sa sahra si zindagi

ranj-o-alam saza na hue ham-nawa hue

badla hai kis nigah ne mahaul is tarah

patthar bhi apne shahr ke sab aaina hue

aawaz-e-haq se KHali hua shahr-e-dil-baran

jab se hamare lab bhi yahan be-sada hue

aae na lauT kar wo kabhi zindagi mein phir

jo lamhe zindagi se hamari KHafa hue

lab se nikal gai thi sadaqat ki koi baat

apne parae hum se yahan sab KHafa hue

likkha hatheliyon pe chaman ne ye hadisa

rang-e-shafaq mein Dub ke barg-e-hina hue

phir chhoDte nishan kahan zindagi ke hum

jab KHwahishon ke dasht mein KHud gard-e-pa hue

gir kar bulandiyon se na uThTha koi 'nazar'

yun to ana mein dub ke kitne KHuda hue