KHushbu-e-pairahan se sulagte rahe dimagh

ḳhushbū-e-pairahan se sulagte rahe dimāġh

aa.ī shab-e-firāq to gul ho ga.e charāġh

dil kī lagī bhaḌak ke nigāhoñ tak aa ga.ī

palkoñ pe shām-e-vasl jalā.e haiñ dil ke daaġh

us chashm-e-mai-farosh se hañgām-e-nāv-nosh

phūTā vo sail-e-nūr ki lau de uThe ayāġh

vo gul khileñ ki jin kī mahak lā-zavāl ho

is ek din meñ ham ne sajā.e haiñ kitne baaġh

āḳhir khulā ki tū hai mire ghar kī raushnī

yuuñ to tire baġhair bhī jalte rahe charāġh

jab chashm-o-dil bujhe to shabistān-e-shauq meñ

ham ne hatheliyoñ pe jalā.e haiñ shab charāġh

jo vādī-e-jamāl meñ gum ho ga.e 'jamīl'

apnī talab ke saath hī un kā bhī kuchh surāġh

KHushbu-e-pairahan se sulagte rahe dimagh

aai shab-e-firaq to gul ho gae charagh

dil ki lagi bhaDak ke nigahon tak aa gai

palkon pe sham-e-wasl jalae hain dil ke dagh

us chashm-e-mai-farosh se hangam-e-naw-nosh

phuTa wo sail-e-nur ki lau de uThe ayagh

wo gul khilen ki jin ki mahak la-zawal ho

is ek din mein hum ne sajae hain kitne bagh

aaKHir khula ki tu hai mere ghar ki raushni

yun to tere baghair bhi jalte rahe charagh

jab chashm-o-dil bujhe to shabistan-e-shauq mein

hum ne hatheliyon pe jalae hain shab charagh

jo wadi-e-jamal mein gum ho gae 'jamil'

apni talab ke sath hi un ka bhi kuchh suragh