KHushbu gulon mein taron mein tabindagi nahin

ḳhushbū guloñ meñ tāroñ meñ tābindagī nahīñ

tum bin kisī bhī shai meñ koī dilkashī nahīñ

jab tum nahīñ ho paas ḳhushī bhī ḳhushī nahīñ

jaltī hai sham.a sham.a meñ bhī raushnī nahīñ

ulfat meñ bhī sukūn kī daulat milī nahīñ

jiitā to huuñ zarūr magar zindagī nahīñ

vo kyā samajh sakegā mohabbat kī azmateñ

jis ko kabhī kisī se mohabbat huī nahīñ

tum mujh ko bevafā.ī ke ta.ane hazār do

ilzām-e-bevafā.ī se tum bhī barī nahīñ

jab se lagī hai aañkh mirī husn-e-yār se

sach pūchhiye to aañkh abhī tak lagī nahīñ

is tarah rāh-e-ishq meñ sajde adā kiye

merī jabīn-e-shauq jhukī phir uThī nahīñ

KHushbu gulon mein taron mein tabindagi nahin

tum bin kisi bhi shai mein koi dilkashi nahin

jab tum nahin ho pas KHushi bhi KHushi nahin

jalti hai shama shama mein bhi raushni nahin

ulfat mein bhi sukun ki daulat mili nahin

jita to hun zarur magar zindagi nahin

wo kya samajh sakega mohabbat ki azmaten

jis ko kabhi kisi se mohabbat hui nahin

tum mujh ko bewafai ke tane hazar do

ilzam-e-bewafai se tum bhi bari nahin

jab se lagi hai aankh meri husn-e-yar se

sach puchhiye to aankh abhi tak lagi nahin

is tarah rah-e-ishq mein sajde ada kiye

meri jabin-e-shauq jhuki phir uThi nahin