KHushbu hamare pyar ki har su bikhar to jae

ḳhushbū hamāre pyaar kī har sū bikhar to jaa.e

bastī se iḳhtilāf kā tūfāñ guzar to jaa.e

merā yaqīn hai use mil jā.egā sukūñ

tūfān merī kashtī meñ do pal Thahar to jaa.e

tanqīd-o-tabsira koī kuchh bhī kare to kyā

merī ġhazal janāb ke dil meñ utar to jaa.e

us se lipaT ke ro.eñgī saarī udāsiyāñ

shām-e-ġham-e-firāq kabhī mere ghar to jaa.e

phir jaa.e vo ḳhalāoñ meñ tahqīq ke liye

apne badan ke ġhaar meñ pahle utar to jaa.e

hai un kī tarbiyat pe nazar is liye mirī

bachchoñ meñ merī zaat kā thoḌā asar to jaa.e

samjhā na us kī pyaas ko ab tak koī yahāñ

dariyā kī tah meñ kaash kisī kī nazar to jaa.e

ye yātrā bhī amn kī dushman na ho kahīñ

logoñ ke dil se pahle ye ḳhauf-o-ḳhatar to jaa.e

kahte the ye 'jamīl' se kal ‘mustafā-jamīl'

merī nazar se aage kisī kī nazar to jaa.e

KHushbu hamare pyar ki har su bikhar to jae

basti se iKHtilaf ka tufan guzar to jae

mera yaqin hai use mil jaega sukun

tufan meri kashti mein do pal Thahar to jae

tanqid-o-tabsira koi kuchh bhi kare to kya

meri ghazal janab ke dil mein utar to jae

us se lipaT ke roengi sari udasiyan

sham-e-gham-e-firaq kabhi mere ghar to jae

phir jae wo KHalaon mein tahqiq ke liye

apne badan ke ghaar mein pahle utar to jae

hai un ki tarbiyat pe nazar is liye meri

bachchon mein meri zat ka thoDa asar to jae

samjha na us ki pyas ko ab tak koi yahan

dariya ki tah mein kash kisi ki nazar to jae

ye yatra bhi amn ki dushman na ho kahin

logon ke dil se pahle ye KHauf-o-KHatar to jae

kahte the ye 'jamil' se kal ‘mustafa-jamil'

meri nazar se aage kisi ki nazar to jae