KHushbu ki KHanqah mein hai mera dasht-e-sabz

ḳhushbū kī ḳhānqāh meñ hai merā dasht-e-sabz

ik ḳhvāb kī panāh meñ hai merā dasht-e-sabz

kis lams kī talab meñ humaktā hai roz-o-shab

kis ḳhvāhish-e-gunāh meñ hai merā dasht-e-sabz

har sub.h-e-āfrīñ kī tamanna meñ hai mudām

har shaam kī nigāh meñ hai merā dasht-e-sabz

go ḳhaak kar chukī hai mujhe terī aarzū

phir bhī tire nibāh meñ hai merā dasht-e-sabz

ai dīda-e-nihāl kī ḳhush-dīda mauj-e-tar

muddat se terī raah meñ hai merā dasht-e-sabz

vo ranj-e-ārzū mirā sadiyoñ ko hai muhīt

jis lamha-e-tabāh meñ hai merā dasht-e-sabz

dhaḌkā lagā huā hai shab-o-roz ab mujhe

kuchh din se chashm-e-shāh meñ hai merā dasht-e-sabz

sāñsoñ se rauñdtā huuñ tamanna ke reg-zār

jab se mirī sipāh meñ hai merā dasht-e-sabz

KHushbu ki KHanqah mein hai mera dasht-e-sabz

ek KHwab ki panah mein hai mera dasht-e-sabz

kis lams ki talab mein humakta hai roz-o-shab

kis KHwahish-e-gunah mein hai mera dasht-e-sabz

har subh-e-afrin ki tamanna mein hai mudam

har sham ki nigah mein hai mera dasht-e-sabz

go KHak kar chuki hai mujhe teri aarzu

phir bhi tere nibah mein hai mera dasht-e-sabz

ai dida-e-nihaal ki KHush-dida mauj-e-tar

muddat se teri rah mein hai mera dasht-e-sabz

wo ranj-e-arzu mera sadiyon ko hai muhit

jis lamha-e-tabah mein hai mera dasht-e-sabz

dhaDka laga hua hai shab-o-roz ab mujhe

kuchh din se chashm-e-shah mein hai mera dasht-e-sabz

sanson se raundta hun tamanna ke reg-zar

jab se meri sipah mein hai mera dasht-e-sabz