KHushbu ki tarah dil ke gulabon mein rahega

ḳhushbū kī tarah dil ke gulāboñ meñ rahegā

vo chāñd hamesha mire ḳhvāboñ meñ rahegā

bhīgī huī āñkhoñ se gale mil ke bichhaḌnā

vo shaḳhs sadā dil ke nisāboñ meñ rahegā

shāyad maiñ abhī us ke jigar tak nahīñ utrā

shāyad vo abhī aur naqāboñ meñ rahegā

sāñsoñ kī tarah maiñ terī nas nas meñ rahūñgā

kho kar tū mujhe ḳhud bhī azāboñ meñ rahegā

nashsha to tere qurb kā hai jān-e-tamannā

kyā lutf tire ba.ad sharāboñ meñ rahegā

haañ pyaar hai haañ pyaar hai suulī pe chaḌhā do

iqrār hai iqrār javāboñ meñ rahegā

phir zard ruteñ dil pe utarne lagīñ 'ayyāz'

dil tab hī bachegā jo ḳharāboñ meñ rahegā

KHushbu ki tarah dil ke gulabon mein rahega

wo chand hamesha mere KHwabon mein rahega

bhigi hui aankhon se gale mil ke bichhaDna

wo shaKHs sada dil ke nisabon mein rahega

shayad main abhi us ke jigar tak nahin utra

shayad wo abhi aur naqabon mein rahega

sanson ki tarah main teri nas nas mein rahunga

kho kar tu mujhe KHud bhi azabon mein rahega

nashsha to tere qurb ka hai jaan-e-tamanna

kya lutf tere baad sharabon mein rahega

han pyar hai han pyar hai suli pe chaDha do

iqrar hai iqrar jawabon mein rahega

phir zard ruten dil pe utarne lagin 'ayyaz'

dil tab hi bachega jo KHarabon mein rahega