KHushbu ko qaid-e-gul se riha kar diya gaya

ḳhushbū ko qaid-e-gul se rihā kar diyā gayā

aur us ke baa'd rizq-e-havā kar diyā gayā

ik dil-navāz ġham kī ye mujh par navāzisheñ

merī barahnagī ko qabā kar diyā gayā

jo bhī milā usī kā garebān chaak thā

ḳhanjar-ba-dast dast-e-sabā kar diyā gayā

thī aadmī ko aur zarūrat zamīn kī

ye kyā ki āsmāñ ko sivā kar diyā gayā

guzrā jo ham pe us kī ḳhudā.ī meñ dosto

vo haar kar supurd-e-ḳhudā kar diyā gayā

us ne kahā ki mujh se bichhaḌne pe ye sukūt

to zindagī meñ hashr bapā kar diyā gayā

majbūr the to raat use mānñā paḌā

jab rang raushnī se judā kar diyā gayā

miTTī kā jism thā so vo miTTī ko de diyā

ye qarz-e-āḳhirī bhī adā kar diyā gayā

KHushbu ko qaid-e-gul se riha kar diya gaya

aur us ke ba'd rizq-e-hawa kar diya gaya

ek dil-nawaz gham ki ye mujh par nawazishen

meri barahnagi ko qaba kar diya gaya

jo bhi mila usi ka gareban chaak tha

KHanjar-ba-dast dast-e-saba kar diya gaya

thi aadmi ko aur zarurat zamin ki

ye kya ki aasman ko siwa kar diya gaya

guzra jo hum pe us ki KHudai mein dosto

wo haar kar supurd-e-KHuda kar diya gaya

us ne kaha ki mujh se bichhaDne pe ye sukut

to zindagi mein hashr bapa kar diya gaya

majbur the to raat use manna paDa

jab rang raushni se juda kar diya gaya

miTTi ka jism tha so wo miTTi ko de diya

ye qarz-e-aKHiri bhi ada kar diya gaya