KHushbu se teri hath milane ka shauq hai

ḳhushbū se terī haath milāne kā shauq hai

phir us ko do-jahāñ se chhupāne kā shauq hai

āñkheñ hoñ ḳhvāb hoñ ki shikasta imārateñ

har ik khañDar meñ diip jalāne kā shauq hai

kuchh der apne saath bhī rahne do ab hameñ

is raushnī ko ā.īna-ḳhāne kā shauq hai

iz.hār-e-ās shauq-e-tamāshā fasurdagī

kyoñ dil ko itnā baar uThāne kā shauq hai

hijrat azal se hai mire ajdād kā shi.ār

mujh ko bhī ek naav banāne kā shauq hai

kyoñ ham ye baat baat pe dene lage javāb

in ko to ḳhair baat baḌhāne kā shauq hai

ik nuur hī to saare taḳhayyul kī jaan hai

aur is pe ham ko rañg jamāne kā shauq hai

har ek ko sanam ho ḳhudā ho ki aadmī

māthe pe mere daaġh lagāne kā shauq hai

barbād hote jā.eñge jitnā karoge tum

ham ko tumhārā haath banāne kā shauq hai

'nainā' unhī kī samt safar kar rahī huuñ maiñ

raste meñ jin ko dhuup bichhāne kā shauq hai

KHushbu se teri hath milane ka shauq hai

phir us ko do-jahan se chhupane ka shauq hai

aankhen hon KHwab hon ki shikasta imaraten

har ek khanDar mein dip jalane ka shauq hai

kuchh der apne sath bhi rahne do ab hamein

is raushni ko aaina-KHane ka shauq hai

izhaar-e-as shauq-e-tamasha fasurdagi

kyon dil ko itna bar uThane ka shauq hai

hijrat azal se hai mere ajdad ka shiar

mujh ko bhi ek naw banane ka shauq hai

kyon hum ye baat baat pe dene lage jawab

in ko to KHair baat baDhane ka shauq hai

ek nur hi to sare taKHayyul ki jaan hai

aur is pe hum ko rang jamane ka shauq hai

har ek ko sanam ho KHuda ho ki aadmi

mathe pe mere dagh lagane ka shauq hai

barbaad hote jaenge jitna karoge tum

hum ko tumhaara hath banane ka shauq hai

'naina' unhi ki samt safar kar rahi hun main

raste mein jin ko dhup bichhane ka shauq hai