KHushi dekhte hain na gham dekhte hain

ḳhushī dekhte haiñ na ġham dekhte haiñ

ham andāz-e-ahl-e-karam dekhte haiñ

har ik shai meñ jazb-e-tasavvur ke sadqe

tumhīñ ko tumhārī qasam dekhte haiñ

sabā sub.h-dam jaane kyā kah ga.ī hai

guloñ kī bhī āñkhoñ ko nam dekhte haiñ

jhukā dete haiñ ham jabīn-e-aqīdat

jahāñ un kā naqsh-e-qadam dekhte haiñ

tirī chashm-e-mai-gūñ ke mai-ḳhvār haiñ jo

vo kab jānib-e-jām-e-jam dekhte haiñ

ye ahl-e-mohabbat kā tarz-e-nazar hai

sitam meñ bhī rang-e-karam dekhte haiñ

'tarab' jāda-paimā-e-ulfat jahāñ meñ

kahāñ raah ke pech-o-ḳham dekhte haiñ

KHushi dekhte hain na gham dekhte hain

hum andaz-e-ahl-e-karam dekhte hain

har ek shai mein jazb-e-tasawwur ke sadqe

tumhin ko tumhaari qasam dekhte hain

saba subh-dam jaane kya kah gai hai

gulon ki bhi aankhon ko nam dekhte hain

jhuka dete hain hum jabin-e-aqidat

jahan un ka naqsh-e-qadam dekhte hain

teri chashm-e-mai-gun ke mai-KHwar hain jo

wo kab jaanib-e-jam-e-jam dekhte hain

ye ahl-e-mohabbat ka tarz-e-nazar hai

sitam mein bhi rang-e-karam dekhte hain

'tarab' jada-paima-e-ulfat jahan mein

kahan rah ke pech-o-KHam dekhte hain