KHushi hai apni na koi malal hai apna

ḳhushī hai apnī na koī malāl hai apnā

vo be-dilī hai ki jiinā muhāl hai apnā

na vo visāl ke qisse na hijr kā ronā

baḌā ajiib sā kuchh din se haal hai apnā

nigāh-e-shauq kī is ko abhī kahāñ parvā

abhī vo shaḳhs asīr-e-jamāl hai apnā

mirī tarah bhī koī zabt-e-ġham se kaam na le

ki apne-āp se poshīda haal hai apnā

ham aise sāhab-e-fan aur ye shahr-e-nā-pursāñ

agar haiñ zinda to ye bhī kamāl hai apnā

jo vo nahīñ na sahī yaad hī sahī us kī

koī to hai jise 'ḳhāvar' ḳhayāl hai apnā

KHushi hai apni na koi malal hai apna

wo be-dili hai ki jina muhaal hai apna

na wo visal ke qisse na hijr ka rona

baDa ajib sa kuchh din se haal hai apna

nigah-e-shauq ki is ko abhi kahan parwa

abhi wo shaKHs asir-e-jamal hai apna

meri tarah bhi koi zabt-e-gham se kaam na le

ki apne-ap se poshida haal hai apna

hum aise sahab-e-fan aur ye shahr-e-na-pursan

agar hain zinda to ye bhi kamal hai apna

jo wo nahin na sahi yaad hi sahi us ki

koi to hai jise 'KHawar' KHayal hai apna