KHushi har dam nahin rahti musalsal gham nahin hota

ḳhushī har dam nahīñ rahtī musalsal ġham nahīñ hotā

mohabbat meñ hamesha ek sā mausam nahīñ hotā

salīqe se bichhaḌte ham pashemānī nahīñ hotī

tumheñ sadma nahīñ hotā hameñ bhī ġham nahīñ hotā

bichhaḌ kar bhī bahut nazdīk rahtā hai tirā saaya

vo mujh se duur jaatā hai magar maddham nahīñ hotā

shikasta paañv vaale bhī to manzil tak pahuñchte haiñ

bahut dushvār rāhoñ meñ bhī jazba kam nahīñ hotā

safā marva nahīñ hotā har ik paanī kī qismat meñ

taḌap kar jo na nikle aab vo zamzam nahīñ hotā

qabīle meñ abhī thoḌī bahut sachchā.ī baaqī hai

yazīd-e-vaqt ke aage mirā sar ḳham nahīñ hotā

'surūr' us ne mohabbat kī qalam se kuchh to likkhā hai

tirā ġham gar nahīñ likhtā to kāġhaz nam nahīñ hotā

KHushi har dam nahin rahti musalsal gham nahin hota

mohabbat mein hamesha ek sa mausam nahin hota

saliqe se bichhaDte hum pashemani nahin hoti

tumhein sadma nahin hota hamein bhi gham nahin hota

bichhaD kar bhi bahut nazdik rahta hai tera saya

wo mujh se dur jata hai magar maddham nahin hota

shikasta panw wale bhi to manzil tak pahunchte hain

bahut dushwar rahon mein bhi jazba kam nahin hota

safa marwa nahin hota har ek pani ki qismat mein

taDap kar jo na nikle aab wo zamzam nahin hota

qabile mein abhi thoDi bahut sachchai baqi hai

yazid-e-waqt ke aage mera sar KHam nahin hota

'surur' us ne mohabbat ki qalam se kuchh to likkha hai

tera gham gar nahin likhta to kaghaz nam nahin hota