KHushi ke bhi gham mein nishan dekhta hun

ḳhushī ke bhī ġham meñ nishāñ dekhtā huuñ

añdhere meñ parchhā.iyāñ dekhtā huuñ

vahīñ un ko maiñ be-takāñ dekhtā huuñ

baġhair aañkh uThā.e jahāñ dekhtā huuñ

nigāh-e-tajassus se hotā huuñ nādim

maiñ jab ḳhud meñ un ko nihāñ dekhtā huuñ

adab kar mazāq-e-nazāra adab kar

nazar ko bhī kyoñ darmiyāñ dekhtā huuñ

jabīñ kī taraf āstāñ baḌh rahā hai

ye maiñ aaj ḳhud ko kahāñ dekhtā huuñ

vo jab dekhte haiñ kabhī merī jānib

to maiñ jānib-e-āsmāñ dekhtā huuñ

jo apnī jagah ḳhud qafas ban ga.e haiñ

kuchh aise bhī maiñ āshiyāñ dekhtā huuñ

bahut rahbar-o-rahnumā aa.e lekin

jahāñ thā vahīñ kārvāñ dekhtā huuñ

natīja bhī jis kā 'shifā' imtihāñ hai

ajab aaj kā imtihāñ dekhtā huuñ

KHushi ke bhi gham mein nishan dekhta hun

andhere mein parchhaiyan dekhta hun

wahin un ko main be-takan dekhta hun

baghair aankh uThae jahan dekhta hun

nigah-e-tajassus se hota hun nadim

main jab KHud mein un ko nihan dekhta hun

adab kar mazaq-e-nazara adab kar

nazar ko bhi kyon darmiyan dekhta hun

jabin ki taraf aastan baDh raha hai

ye main aaj KHud ko kahan dekhta hun

wo jab dekhte hain kabhi meri jaanib

to main jaanib-e-asman dekhta hun

jo apni jagah KHud qafas ban gae hain

kuchh aise bhi main aashiyan dekhta hun

bahut rahbar-o-rahnuma aae lekin

jahan tha wahin karwan dekhta hun

natija bhi jis ka 'shifa' imtihan hai

ajab aaj ka imtihan dekhta hun