KHushi ke nur se mamur baam-o-dar rakhiye

ḳhushī ke nuur se māmūr bām-o-dar rakhiye

nashāt-o-rang se ābād apnā ghar rakhiye

nizām-e-nau ke liye fikr-e-mo'atabar rakhiye

agar shu.ūr hai hālāt par nazar rakhiye

ye kaam aa.egī hastī kī rahguzāroñ meñ

kamāl-e-azm kī daulat sañbhāl kar rakhiye

hamārī is ke sivā aur aarzū kyā hai

hamāre vāste ik pyaar kī nazar rakhiye

jo chāhte ho mohabbat kī raushnī phaile

diye ḳhulūs ke dil kī fasīl par rakhiye

payām-e-fikr-o-nazar ho jo har bashar ke liye

tasavvurāt meñ aisī bhī ik sahar rakhiye

jo fan ke naam pe tashkīl paane vaalī hai

us anjuman kā koī naam soch kar rakhiye

ye zindagī kā safar ḳhatm hone vaalā hai

qiyām ke liye sāmān muḳhtasar rakhiye

yahī 'nigār' taqāzā hai ilm-o-dānish kā

haqīqatoñ se zamāne ko bā-ḳhabar rakhiye

KHushi ke nur se mamur baam-o-dar rakhiye

nashat-o-rang se aabaad apna ghar rakhiye

nizam-e-nau ke liye fikr-e-mo'atabar rakhiye

agar shuur hai haalat par nazar rakhiye

ye kaam aaegi hasti ki rahguzaron mein

kamal-e-azm ki daulat sanbhaal kar rakhiye

hamari is ke siwa aur aarzu kya hai

hamare waste ek pyar ki nazar rakhiye

jo chahte ho mohabbat ki raushni phaile

diye KHulus ke dil ki fasil par rakhiye

payam-e-fikr-o-nazar ho jo har bashar ke liye

tasawwuraat mein aisi bhi ek sahar rakhiye

jo fan ke nam pe tashkil pane wali hai

us anjuman ka koi nam soch kar rakhiye

ye zindagi ka safar KHatm hone wala hai

qiyam ke liye saman muKHtasar rakhiye

yahi 'nigar' taqaza hai ilm-o-danish ka

haqiqaton se zamane ko ba-KHabar rakhiye