خوشی کے وقت بھی وہ لگ رہا تھا رویا ہوا

خوشی کے وقت بھی وہ لگ رہا تھا رویا ہوا

تھا باغ وصل میں فرقت کا بیج بویا ہوا

وہ رات خواب میں آیا ہوا تھا ملنے مجھے

مرا نصیب تھا بیدار میں تھا سویا ہوا

نیا لباس کفن تھوڑی ہے جو مل جائے

سو ہم نے عید پہ پہنا لباس دھویا ہوا

وہ میرے سامنے ہے اور فون میں گم ہے

ملا ہے برسوں کا کھویا ہوا بھی کھویا ہوا

تو جس کی لاش کو اب جھیل سے نکالتا ہے

وہ بحر غم میں تھا پہلے ترا ڈبویا ہوا

ستم گرو یہ سزاؤں کی فصل کاٹو اب

کسی نے خون سے تھا انقلاب بویا ہوا

تو یوں سمجھتا ہے حق دار خود کو شہرت کا

تجھے مرے ہوئے عرصہ نبیلؔ گویا ہوا