KHushi ke waqt bhi wo lag raha tha roya hua

ḳhushī ke vaqt bhī vo lag rahā thā royā huā

thā bāġh-e-vasl meñ furqat kā biij boyā huā

vo raat ḳhvāb meñ aaya huā thā milne mujhe

mirā nasīb thā bedār maiñ thā soyā huā

nayā libās kafan thoḌī hai jo mil jaa.e

so ham ne iid pe pahnā libās dhoyā huā

vo mere sāmne hai aur phone meñ gum hai

milā hai barsoñ kā khoyā huā bhī khoyā huā

tū jis kī laash ko ab jhiil se nikāltā hai

vo bahr-e-ġham meñ thā pahle tirā Duboyā huā

sitamgaro ye sazāoñ kī fasl kaaTo ab

kisī ne ḳhuun se thā inqalāb boyā huā

tū yuuñ samajhtā hai haqdār ḳhud ko shohrat kā

tujhe mare hue arsa 'nabīl' goyā huā

KHushi ke waqt bhi wo lag raha tha roya hua

tha bagh-e-wasl mein furqat ka bij boya hua

wo raat KHwab mein aaya hua tha milne mujhe

mera nasib tha bedar main tha soya hua

naya libas kafan thoDi hai jo mil jae

so hum ne id pe pahna libas dhoya hua

wo mere samne hai aur phone mein gum hai

mila hai barson ka khoya hua bhi khoya hua

tu jis ki lash ko ab jhil se nikalta hai

wo bahr-e-gham mein tha pahle tera Duboya hua

sitamgaro ye sazaon ki fasl kaTo ab

kisi ne KHun se tha inqalab boya hua

tu yun samajhta hai haqdar KHud ko shohrat ka

tujhe mare hue arsa 'nabil' goya hua