KHushi ke waqt se daur-e-malal se guzre

ḳhushī ke vaqt se daur-e-malāl se guzre

tirī talāsh meñ hadd-e-ḳhayāl se guzre

hameñ to asl meñ tanhā tujhī se milnā thā

so ik nazar meñ tire ḳhadd-o-ḳhāl se guzre

bujhe bujhe se haiñ ġhunchoñ kī zindagī ke charāġh

sabā se kah do chaman meñ ḳhayāl se guzre

tire faqīr mohabbat ke ek lamhe meñ

hazār baar urūj-o-zavāl se guzre

junūñ kī fitrat-e-ālī pe baar hai ai dost

vo bandagī jo maqām-e-savāl se guzre

kahīñ na dāman-e-ādāb-e-ishq ko chhoḌā

firāq hī kī tarah ham visāl se guzre

dil-o-nazar ko ḳhabar tak nahīñ huī 'maikash'

kuchh is tarah vo hudūd-e-ḳhayāl se guzre

KHushi ke waqt se daur-e-malal se guzre

teri talash mein hadd-e-KHayal se guzre

hamein to asl mein tanha tujhi se milna tha

so ek nazar mein tere KHadd-o-KHal se guzre

bujhe bujhe se hain ghunchon ki zindagi ke charagh

saba se kah do chaman mein KHayal se guzre

tere faqir mohabbat ke ek lamhe mein

hazar bar uruj-o-zawal se guzre

junun ki fitrat-e-ali pe bar hai ai dost

wo bandagi jo maqam-e-sawal se guzre

kahin na daman-e-adab-e-ishq ko chhoDa

firaq hi ki tarah hum visal se guzre

dil-o-nazar ko KHabar tak nahin hui 'maikash'

kuchh is tarah wo hudud-e-KHayal se guzre