KHushi ke yas ke lamhe hamein rulate hain

ḳhushī ke yaas ke lamhe hameñ rulāte haiñ

ki zindagī meñ nasheb-o-farāz aate haiñ

jalāo apne laboñ par tabassumoñ ke diye

añdhere ġham ke to aate haiñ aur jaate haiñ

kabhī jo dil meñ vafā ke charāġh jalte the

magar vo aaj kahāñ raushnī luTāte haiñ

jahāñ bhī jā.ūñ vahāñ par sukūñ nahīñ miltā

har ik jagah pe na.e hādse satāte haiñ

jo ho bhī jaa.e tamannā kā ḳhuun sah lenā

ye abr vo haiñ jo mausam badal ke jaate haiñ

tire nasīb ke taare bhī 'shād' chamkeñge

ham ab charāġh tirī raah meñ jalāte haiñ

KHushi ke yas ke lamhe hamein rulate hain

ki zindagi mein nasheb-o-faraaz aate hain

jalao apne labon par tabassumon ke diye

andhere gham ke to aate hain aur jate hain

kabhi jo dil mein wafa ke charagh jalte the

magar wo aaj kahan raushni luTate hain

jahan bhi jaun wahan par sukun nahin milta

har ek jagah pe nae hadse satate hain

jo ho bhi jae tamanna ka KHun sah lena

ye abr wo hain jo mausam badal ke jate hain

tere nasib ke tare bhi 'shad' chamkenge

hum ab charagh teri rah mein jalate hain