KHushi ki aarzu ko pa ke mahrum-e-KHushi maine

ḳhushī kī aarzū ko pā ke mahrūm-e-ḳhushī maiñ ne

ḳhushī kī aarzū dil meñ kabhī palne na dī maiñ ne

vatan kī sar-zamīñ jis par luTā dī zindagī maiñ ne

vahīñ apne liye paa.ī mohabbat kī kamī maiñ ne

jo merī jaan ke dushman the un par jaan dī maiñ ne

sikhā.ī yuuñ bhī apne dushmanoñ ko dostī maiñ ne

siyāsat se fasādoñ kā banā maskan vatan merā

jahāñ sadiyoñ diyā paiġhām-e-sulh-o-āshtī maiñ ne

gul-afshāñ jo zamīñ thī vo zamīñ ab aag ugaltī hai

ajab ta.abīr dekhī hurriyat ke ḳhvāb kī maiñ ne

sahar kaisī sahar kā zikr bhī ik jurm Thahrā hai

añdherī raat kā dekhā hai ye andher bhī maiñ ne

vahāñ mujh ko mohazzab bhī na maanā jaa.e hairat se

jahāñ tahzīb kī buniyād rakkhī thī kabhī maiñ ne

ye taufīq apnī apnī apnā apnā zarf hai pyāre

musalsal tū ne kī bedād paiham daad dī maiñ ne

shikasta-pā.ī se maiñ apnī pīchhe rah gayā be-shak

magar tezī-e-raftār-e-jahāñ to jaan lī maiñ ne

ye ab tujh par hai to qadmoñ meñ rahne de ki Thukrā de

tire qadmoñ meñ rakh dī apne dil kī har ḳhushī maiñ ne

yaqīnan vaj.h-e-baḳhshish nāz-e-umr-e-bandagī hotā

kiyā hotā agar shāyān-e-dar ik sajda bhī maiñ ne

yahī kuchh kam nahīñ kam āgahī ke is zamāne meñ

jahān-e-sher ko baḳhshā 'vaqār'-e-āgahī maiñ ne

KHushi ki aarzu ko pa ke mahrum-e-KHushi main ne

KHushi ki aarzu dil mein kabhi palne na di main ne

watan ki sar-zamin jis par luTa di zindagi main ne

wahin apne liye pai mohabbat ki kami main ne

jo meri jaan ke dushman the un par jaan di main ne

sikhai yun bhi apne dushmanon ko dosti main ne

siyasat se fasadon ka bana maskan watan mera

jahan sadiyon diya paigham-e-sulh-o-ashti main ne

gul-afshan jo zamin thi wo zamin ab aag ugalti hai

ajab tabir dekhi hurriyat ke KHwab ki main ne

sahar kaisi sahar ka zikr bhi ek jurm Thahra hai

andheri raat ka dekha hai ye andher bhi main ne

wahan mujh ko mohazzab bhi na mana jae hairat se

jahan tahzib ki buniyaad rakkhi thi kabhi main ne

ye taufiq apni apni apna apna zarf hai pyare

musalsal tu ne ki bedad paiham dad di main ne

shikasta-pai se main apni pichhe rah gaya be-shak

magar tezi-e-raftar-e-jahan to jaan li main ne

ye ab tujh par hai to qadmon mein rahne de ki Thukra de

tere qadmon mein rakh di apne dil ki har KHushi main ne

yaqinan wajh-e-baKHshish naz-e-umr-e-bandagi hota

kiya hota agar shayan-e-dar ek sajda bhi main ne

yahi kuchh kam nahin kam aagahi ke is zamane mein

jahan-e-sher ko baKHsha 'waqar'-e-agahi main ne