KHushi ko pane ka nusKHa badal ke aae hain

ḳhushī ko paane kā nusḳha badal ke aa.e haiñ

ham apne dil kī tamanna badal ke aa.e haiñ

hamārī ḳhūbiyāñ kaise unheñ nazar aa.eñ

ki vo nazar nahīñ chashma badal ke aa.e haiñ

rivāyatoñ ko banāte nahīñ haiñ husn-e-ġhazal

ke ham ġhazal kā maqāla badal ke aa.e haiñ

javāharāt ke daane haiñ taar sone ke

na.e shikārī haiñ piñjra badal ke aa.e haiñ

vo muflisoñ kī thī bastī isī liye shāyad

khilaune vaale bhī rasta badal ke aa.e haiñ

havā.eñ apne Thikānoñ ko lauT jā.eñgī

ham apnī khiḌkī kā parda badal ke aa.e haiñ

'adīb' farq nahīñ dost aur dushman meñ

ki dost bhī to mukhauTā badal ke aa.e haiñ

KHushi ko pane ka nusKHa badal ke aae hain

hum apne dil ki tamanna badal ke aae hain

hamari KHubiyan kaise unhen nazar aaen

ki wo nazar nahin chashma badal ke aae hain

riwayaton ko banate nahin hain husn-e-ghazal

ke hum ghazal ka maqala badal ke aae hain

jawaharaat ke dane hain tar sone ke

nae shikari hain pinjra badal ke aae hain

wo muflison ki thi basti isi liye shayad

khilaune wale bhi rasta badal ke aae hain

hawaen apne Thikanon ko lauT jaengi

hum apni khiDki ka parda badal ke aae hain

'adib' farq nahin dost aur dushman mein

ki dost bhi to mukhauTa badal ke aae hain