خوشی ملے نہ ملے غم سے پیار کرتے ہیں

خوشی ملے نہ ملے غم سے پیار کرتے ہیں

وفا کی راہ سے ہم اس طرح گزرتے ہیں

ہمیں خبر ہے تیرا لوٹنا نہیں ممکن

مگر ہم اب بھی ترا انتظار کرتے ہیں

سفینے دامن ساحل میں ڈوب جاتے ہیں

جو حوصلہ ہو تو طوفاں میں بھی ابھرتے ہیں

میں آئنہ ہوں حقیقت کا ذہن کا دل کا

اگر میں سامنے آؤں تو لوگ ڈرتے ہیں

شراب خانے کا رستہ بڑا مقدس ہے

جناب شیخ بھی اس راہ سے گزرتے ہیں

گلوں کے زخم بھریں کیسے اشک شبنمؔ سے

گلوں کے زخم تو خون جگر سے بھرتے ہیں