KHushi na mil saki aankhen meri pur-ab rahin

ḳhushī na mil sakī āñkheñ mirī pur-āb rahīñ

ḳhayāl-o-ḳhvāb kī bāteñ ḳhayāl-o-ḳhvāb rahīñ

sahar huī na mire shahr-e-ārzū meñ kabhī

ki mehr-e-husn kī kirneñ pas-e-naqāb rahīñ

unhī ke dam se hai qaa.em vaqār-e-sajda-e-shukr

vo log jin kī sadā qismateñ ḳharāb rahīñ

kisī ne bhī dar-e-ehsās apnā vā na kiyā

dukhe diloñ kī sadā.eñ na kāmyāb rahīñ

sukūñ se rahte haiñ kis tarah log duniyā meñ

mire liye to ye sāñseñ bhī ik azaab rahīñ

rah-e-vafā meñ nigāhoñ se ho ga.iiñ ojhal

jo sūrateñ mirī āñkhoñ kā intiḳhāb rahīñ

base hue haiñ mire ḳhvāb jin meñ ai 'ābid'

vo bastiyāñ to hamesha hī zer-e-āb rahīñ

KHushi na mil saki aankhen meri pur-ab rahin

KHayal-o-KHwab ki baaten KHayal-o-KHwab rahin

sahar hui na mere shahr-e-arzu mein kabhi

ki mehr-e-husn ki kirnen pas-e-naqab rahin

unhi ke dam se hai qaem waqar-e-sajda-e-shukr

wo log jin ki sada qismaten KHarab rahin

kisi ne bhi dar-e-ehsas apna wa na kiya

dukhe dilon ki sadaen na kaamyab rahin

sukun se rahte hain kis tarah log duniya mein

mere liye to ye sansen bhi ek azab rahin

rah-e-wafa mein nigahon se ho gain ojhal

jo suraten meri aankhon ka intiKHab rahin

base hue hain mere KHwab jin mein ai 'abid'

wo bastiyan to hamesha hi zer-e-ab rahin