خوشی ضروری نہیں صرف زندگی کے لیے

خوشی ضروری نہیں صرف زندگی کے لیے

متاع غم بھی ضروری ہے آدمی کے لیے

نہ ہوگا رائیگاں اس شخص کا کوئی سجدہ

جو دل سے سر کو جھکاتا ہے بندگی کے لیے

یہ کیسی آگ لگائی ہے نفرتوں کی یہاں

ترس رہا ہے ہر اک شخص اک ہنسی کے لیے

پتہ نہیں تمہیں یہ کام کتنا مشکل ہے

رہ وفا میں نکل آئے عاشقی کے لیے

تو بے نقاب سر بزم ساقیا آ جا

ترس رہی ہے مری آنکھ مے کشی کے لیے

تمہاری یاد کی خوشبو ملی مجھے ہر پل

اٹھایا جب بھی قلم میں نے شاعری کے لیے

حد نگاہ یہاں دھوپ ہی کا صحرا ہے

حراؔ بتاؤ کہاں جائیں تشنگی کے لیے