KHushi zaruri nahin sirf zindagi ke liye

ḳhushī zarūrī nahīñ sirf zindagī ke liye

matā-e-ġham bhī zarūrī hai aadmī ke liye

na hogā rā.egāñ us shaḳhs kā koī sajda

jo dil se sar ko jhukātā hai bandagī ke liye

ye kaisī aag lagā.ī hai nafratoñ kī yahāñ

taras rahā hai har ik shaḳhs ik hañsī ke liye

pata nahīñ tumheñ ye kaam kitnā mushkil hai

rah-e-vafā meñ nikal aa.e āshiqī ke liye

tū be-naqāb sar-e-bazm sāqiyā aa jā

taras rahī hai mirī aañkh mai-kashī ke liye

tumhārī yaad kī ḳhushbū milī mujhe har pal

uThāyā jab bhī qalam maiñ ne shā.erī ke liye

had-e-nigāh yahāñ dhuup hī kā sahrā hai

'hirā' batāo kahāñ jaa.eñ tishnagī ke liye

KHushi zaruri nahin sirf zindagi ke liye

mata-e-gham bhi zaruri hai aadmi ke liye

na hoga raegan us shaKHs ka koi sajda

jo dil se sar ko jhukata hai bandagi ke liye

ye kaisi aag lagai hai nafraton ki yahan

taras raha hai har ek shaKHs ek hansi ke liye

pata nahin tumhein ye kaam kitna mushkil hai

rah-e-wafa mein nikal aae aashiqi ke liye

tu be-naqab sar-e-bazm saqiya aa ja

taras rahi hai meri aankh mai-kashi ke liye

tumhaari yaad ki KHushbu mili mujhe har pal

uThaya jab bhi qalam main ne shaeri ke liye

had-e-nigah yahan dhup hi ka sahra hai

'hira' batao kahan jaen tishnagi ke liye