KHushiyan mat de mujhko dard-o-kaif ki daulat de sain

ḳhushiyāñ mat de mujh ko dard-o-kaif kī daulat de sā.īñ

mujh ko mere dil ke ik ik zaḳhm kī ujrat de sā.īñ

merī anā kī shah-e-rag par ḳhud merī anā kā ḳhanjar hai

mere lahū ke har qatre ko phir se hiddat de sā.īñ

ism-e-zāt kā raaz hai jo ḳhud mere uupar faash to kar

mere dil ke ā.īne ko phir se hairat de sā.īñ

toḌ de vo dīvār-e-nafas jo beach meñ mere haa.il hai

mujh ko mujh se milne kī ik baar jo mohlat de sā.īñ

maiñ bhī to miTTī huuñ vo bhī tere chaak kī miTTī huuñ

apne chaak kī miTTī ko achchhī sī sūrat de sā.īñ

duniyā kā ye jāh-o-hasham ye mansab ye jāgīr hai kyā

daulat kaisī mujh ko merā kāsa-e-usrat de sā.īñ

mere is lahje ko bhī ab ek nayā āhañg to de

mere saare alfāz-o-afkār ko nudrat de sā.īñ

kār-e-jahāñ ke mansab se tū 'shāhid' ko ma.azūl bhī kar

kaam use jo kuchh bhī de vo hasb-e-zarūrat de sā.īñ

KHushiyan mat de mujh ko dard-o-kaif ki daulat de sain

mujh ko mere dil ke ek ek zaKHm ki ujrat de sain

meri ana ki shah-e-rag par KHud meri ana ka KHanjar hai

mere lahu ke har qatre ko phir se hiddat de sain

ism-e-zat ka raaz hai jo KHud mere upar fash to kar

mere dil ke aaine ko phir se hairat de sain

toD de wo diwar-e-nafas jo beach mein mere hail hai

mujh ko mujh se milne ki ek bar jo mohlat de sain

main bhi to miTTi hun wo bhi tere chaak ki miTTi hun

apne chaak ki miTTi ko achchhi si surat de sain

duniya ka ye jah-o-hasham ye mansab ye jagir hai kya

daulat kaisi mujh ko mera kasa-e-usrat de sain

mere is lahje ko bhi ab ek naya aahang to de

mere sare alfaz-o-afkar ko nudrat de sain

kar-e-jahan ke mansab se tu 'shahid' ko mazul bhi kar

kaam use jo kuchh bhi de wo hasb-e-zarurat de sain