KHushk aankhon se kahan tai ye masafat hogi

ḳhushk āñkhoñ se kahāñ tai ye masāfat hogī

dil ko samjhāyā thā ashkoñ kī zarūrat hogī

rañg mahloñ ke hasīñ ḳhvāb se bach kar rahnā

hai ḳhabar garm ki ḳhvāboñ kī tijārat hogī

apne ghar ḳhud hī pashemān sā lauT aayā huuñ

maiñ samajhtā thā use merī zarūrat hogī

merī tanhā.ī sukūñ dene lagī hai mujh ko

us se mat kahnā sunegā to nadāmat hogī

ḳhushk lab pyaas kī tasvīr ke andar rakh do

pyaas bujh jā.egī dariyā ko bhī hairat hogī

silsila jalte charāġhoñ kā chalo ḳhatm huā

tīrgī ḳhush hai havāoñ ko bhī rāhat hogī

kab sahar phūTegī koī tire zindānoñ se

kab rihā.ī mirī ai shahr-e-aziyyat hogī

jaise mumkin ho in ashkoñ ko bachāo 'tāriq'

shaam aa.ī to charāġhoñ kī zarūrat hogī

KHushk aankhon se kahan tai ye masafat hogi

dil ko samjhaya tha ashkon ki zarurat hogi

rang mahlon ke hasin KHwab se bach kar rahna

hai KHabar garm ki KHwabon ki tijarat hogi

apne ghar KHud hi pasheman sa lauT aaya hun

main samajhta tha use meri zarurat hogi

meri tanhai sukun dene lagi hai mujh ko

us se mat kahna sunega to nadamat hogi

KHushk lab pyas ki taswir ke andar rakh do

pyas bujh jaegi dariya ko bhi hairat hogi

silsila jalte charaghon ka chalo KHatm hua

tirgi KHush hai hawaon ko bhi rahat hogi

kab sahar phuTegi koi tere zindanon se

kab rihai meri ai shahr-e-aziyyat hogi

jaise mumkin ho in ashkon ko bachao 'tariq'

sham aai to charaghon ki zarurat hogi