KHushk aankhon mein kuchh nami ke liye

ḳhushk āñkhoñ meñ kuchh namī ke liye

dil pareshāñ hai ik ḳhushī ke liye

aap rūTheñ to dil ye taḌpegā

saañs TuuTe na naġhmagī ke liye

is ko jaadū nahīñ to kyā kahiye

dil machaltā hai ajnabī ke liye

jis ne thāmā hai dil se haath mirā

dil dhaḌaktā hai bas usī ke liye

ham se qaa.em hai husn kī duniyā

ishq hai husn-e-zindagī ke liye

phuul ik dar pe us ke chhoḌ aayā

maiñ ne dānista muḳhbirī ke liye

vaqt marham hai zaḳhm bhar degā

chāhiye sabr zindagī ke liye

dushmanī kab thī hāsil-e-'maqsūd'

haath baḌhte haiñ dostī ke liye

KHushk aankhon mein kuchh nami ke liye

dil pareshan hai ek KHushi ke liye

aap ruThen to dil ye taDpega

sans TuTe na naghmagi ke liye

is ko jadu nahin to kya kahiye

dil machalta hai ajnabi ke liye

jis ne thama hai dil se hath mera

dil dhaDakta hai bas usi ke liye

hum se qaem hai husn ki duniya

ishq hai husn-e-zindagi ke liye

phul ek dar pe us ke chhoD aaya

main ne danista muKHbiri ke liye

waqt marham hai zaKHm bhar dega

chahiye sabr zindagi ke liye

dushmani kab thi hasil-e-'maqsud'

hath baDhte hain dosti ke liye