KHushk bahut ho jate hain jab hum sahra ho jate hain

ḳhushk bahut ho jaate haiñ jab ham sahrā ho jaate haiñ

sahrā meñ bhī āb-rasānī ke dar vā ho jaate haiñ

raat meñ us ke dar par rote rote mar jaate haiñ ham

sub.h ko vo qum kah detā hai phir zinda ho jaate haiñ

ham nāpāk rahā karte haiñ vasl nahīñ karte haiñ jab

us ke badan ke aab meñ dhul kar pākīza ho jaate haiñ

āñkheñ vo zindāñ haiñ jin meñ ik chehra rah jaatā hai

raushnī manzar nīñdeñ aañsū ḳhvāb rihā ho jaate haiñ

miTTī kī tā'zīm karo to aur takabbur kartī hai

kankar patthar jaise ādam-zād ḳhudā ho jaate haiñ

us ke visāl kā allah jaane ham to itnā jānte haiñ

us ke badan kī zad meñ aa kar vasl-zada ho jaate haiñ

KHushk bahut ho jate hain jab hum sahra ho jate hain

sahra mein bhi aab-rasani ke dar wa ho jate hain

raat mein us ke dar par rote rote mar jate hain hum

subh ko wo qum kah deta hai phir zinda ho jate hain

hum napak raha karte hain wasl nahin karte hain jab

us ke badan ke aab mein dhul kar pakiza ho jate hain

aankhen wo zindan hain jin mein ek chehra rah jata hai

raushni manzar ninden aansu KHwab riha ho jate hain

miTTi ki ta'zim karo to aur takabbur karti hai

kankar patthar jaise aadam-zad KHuda ho jate hain

us ke visal ka allah jaane hum to itna jaante hain

us ke badan ki zad mein aa kar wasl-zada ho jate hain