KHushk kheti hai magar usko hari kahte hain

ḳhushk khetī hai magar us ko harī kahte haiñ

kam-nigāhī ko bhī vo dīda-varī kahte haiñ

fikr-e-raushan ko vo shorīda-sarī kahte haiñ

yaanī sūraj ko charāġh-e-saharī kahte haiñ

jo tire dar se uThā phir vo kahīñ kā na rahā

us kī qismat meñ rahī dar-badrī kahte haiñ

kitnī be-rahm hai fitrat unheñ mālūm nahīñ

jo use kārgah-e-shīshagarī kahte haiñ

husn ke baab meñ 'akbar' kī sanad kaafī hai

ham bhī har ik but-e-kamsin ko parī kahte haiñ

rūh-e-sayyad pe ḳhudā jaane guzar jā.egī kyā

aam alī-gaḌh meñ huī kam-nazarī kahte haiñ

KHushk kheti hai magar us ko hari kahte hain

kam-nigahi ko bhi wo dida-wari kahte hain

fikr-e-raushan ko wo shorida-sari kahte hain

yani suraj ko charagh-e-sahari kahte hain

jo tere dar se uTha phir wo kahin ka na raha

us ki qismat mein rahi dar-badri kahte hain

kitni be-rahm hai fitrat unhen malum nahin

jo use kargah-e-shishagari kahte hain

husn ke bab mein 'akbar' ki sanad kafi hai

hum bhi har ek but-e-kamsin ko pari kahte hain

ruh-e-sayyad pe KHuda jaane guzar jaegi kya

aam ali-gaDh mein hui kam-nazari kahte hain