KHushk uski zat ka saton samundar ho gaya

ḳhushk us kī zaat kā sātoñ samundar ho gayā

dhuup kuchh aisī paḌī vo shaḳhs banjar ho gayā

āñgan āñgan zahr barsā.egī us kī chāñdnī

vo agar mahtāb kī sūrat ujāgar ho gayā

mere aadhe jism kī us ko lagegī bad-du'ā

kal ḳhabar aa jā.egī vo shaḳhs patthar ho gayā

kis ne apne haath se ḳhud maut kā katba likhā

kaun apnī qabr par 'ibrat kā patthar ho gayā

qurb jab had se baḌhā duurī muqaddar ho ga.ī

us kā milnā bhī na milne ke barābar ho gayā

maiñ ki bāhar kī fazā meñ qaid thā jis ke sabab

aaj vo ḳhud jins ke piñjre ke andar ho gayā

muft meñ taqsīm kī 'sājid' matā-e-shā.erī

jis ne apnā qurb apnāyā vo shā'ir ho gayā

KHushk us ki zat ka saton samundar ho gaya

dhup kuchh aisi paDi wo shaKHs banjar ho gaya

aangan aangan zahr barsaegi us ki chandni

wo agar mahtab ki surat ujagar ho gaya

mere aadhe jism ki us ko lagegi bad-du'a

kal KHabar aa jaegi wo shaKHs patthar ho gaya

kis ne apne hath se KHud maut ka katba likha

kaun apni qabr par 'ibrat ka patthar ho gaya

qurb jab had se baDha duri muqaddar ho gai

us ka milna bhi na milne ke barabar ho gaya

main ki bahar ki faza mein qaid tha jis ke sabab

aaj wo KHud jins ke pinjre ke andar ho gaya

muft mein taqsim ki 'sajid' mata-e-shaeri

jis ne apna qurb apnaya wo sha'ir ho gaya