خوب تماشا ہم کو بنایا آپ تماشا آپ ہوئے

خوب تماشا ہم کو بنایا آپ تماشا آپ ہوئے

ہم کو رسوا کرنے نکلے کیسے رسوا آپ ہوئے

تہمت کعبہ آپ نے لی بدنام کلیسا آپ ہوئے

طور پہ بجلی قصر میں شیریں نجد میں لیلہ آپ ہوئے

معنی و صورت وحدت و کثرت ذرہ و صحرا آپ ہوئے

آپ تو کچھ ہوتے ہی نہیں تھے کہئے کیا کیا آپ ہوئے

ہم پہ شریعت ہم پہ طریقت ہم پہ حدود فکر و نظر

آپ چلے تو گلشن گلشن صحرا صحرا آپ ہوئے

شعلے سے ہی راکھ ہوئی تھی شعلے سے پھر راکھ جلی

خرمن موسیٰ کون بنا جب برق تجلی آپ ہوئے

آپ نے چھپ چھپ کر اس دل میں اپنی اک تصویر گڑھی

پوج کے اس کو ہم ہوئے کافر کفر کا فتویٰ آپ ہوئے

روز ازل سے آپ کی میری کیسی رسم و راہ نبھی

اول اول ہم ہوئے شیدا آخر شیدا آپ ہوئے