KHub thin mai-kade ki fazaen

ḳhuub thiiñ mai-kade kī fazā.eñ

rah ga.iiñ chhaT ke ġham kī ghaTā.eñ

maut imdād ko aa chukī hai

un se kah do ki vo ab na aa.eñ

sho.ala-e-husn se kyā bachegā

dāman-e-dil ko ham kyā bachā.eñ

hashr Dhātī hai jumbish nazar kī

fitna-gar haiñ kisī kī adā.eñ

sochte haiñ ki us bevafā ko

yaad rakkheñ ki ham bhuul jaa.eñ

hādsāt-e-jahāñ tauba tauba

uTh ga.iiñ haiñ jahāñ se vafā.eñ

dil meñ ābād hai ek duniyā

aap mahrūmiyoñ par na jaa.eñ

gosha-e-dil se 'parvez' ab tak

aa rahī haiñ kisī kī sadā.eñ

KHub thin mai-kade ki fazaen

rah gain chhaT ke gham ki ghaTaen

maut imdad ko aa chuki hai

un se kah do ki wo ab na aaen

shoala-e-husn se kya bachega

daman-e-dil ko hum kya bachaen

hashr Dhati hai jumbish nazar ki

fitna-gar hain kisi ki adaen

sochte hain ki us bewafa ko

yaad rakkhen ki hum bhul jaen

hadsat-e-jahan tauba tauba

uTh gain hain jahan se wafaen

dil mein aabaad hai ek duniya

aap mahrumiyon par na jaen

gosha-e-dil se 'parwez' ab tak

aa rahi hain kisi ki sadaen