KHuban-e-fusun-gar se hum uljha nahin karte

ḳhūbān-e-fusūñ-gar se ham uljhā nahīñ karte

jādū-garoñ kī zulf meñ laTkā nahīñ karte

Darte haiñ ki nāloñ se qayāmat na machā duuñ

is ḳhauf se vo vāda-e-fardā nahīñ karte

barbād haiñ lekin nahīñ yāroñ se mukaddar

go ḳhaak haiñ par dil kabhī mailā nahīñ karte

iqrār-e-shifā karte haiñ par rakhte haiñ bīmār

achchhā jo vo kahte haiñ kuchh achchhā nahīñ karte

sūraj haiñ kabhī chāñd kabhī sham.a kabhī phuul

kis roz na.e ruup vo badlā nahīñ karte

dil se huuñ 'munīr' apne maiñ ustād kā āshiq

tauqīr o ri.āyat mirī kyā kyā nahīñ karte

KHuban-e-fusun-gar se hum uljha nahin karte

jadu-garon ki zulf mein laTka nahin karte

Darte hain ki nalon se qayamat na macha dun

is KHauf se wo wada-e-farda nahin karte

barbaad hain lekin nahin yaron se mukaddar

go KHak hain par dil kabhi maila nahin karte

iqrar-e-shifa karte hain par rakhte hain bimar

achchha jo wo kahte hain kuchh achchha nahin karte

suraj hain kabhi chand kabhi shama kabhi phul

kis roz nae rup wo badla nahin karte

dil se hun 'munir' apne main ustad ka aashiq

tauqir o riayat meri kya kya nahin karte