KHubsurat to na tha dilkash magar chehra laga

ḳhūbsūrat to na thā dilkash magar chehra lagā

maañ kī āñkhoñ meñ jo dekhā chāñd kā TukḌā lagā

pahle vo bad-rang sā ik kāñch kā TukḌā lagā

haath meñ tum ne liyā to aa.ina achchhā lagā

jis kā jī kartā hai aa jaatā hai vo hañstā huā

kis qadar āsān mere dil kā darvāza lagā

dūriyāñ saarī simaT kar aa ga.iiñ dālān tak

vo parī-ruḳh yak-ba-yak siine se mere aa lagā

shahr ke logoñ ke andar thī bahut apnā.iyat

go ki har chehra thā begāna magar apnā lagā

pyaar se Daalī nazar jab maañ ke chehre kī taraf

jhurriyoñ se pur vo chehra kis qadar pyārā lagā

mudda.ī ḳhush the sazā-e-maut par 'tāriq' magar

kyoñ mujhe munsif kā chehra itnā afsurda lagā

KHubsurat to na tha dilkash magar chehra laga

man ki aankhon mein jo dekha chand ka TukDa laga

pahle wo bad-rang sa ek kanch ka TukDa laga

hath mein tum ne liya to aaina achchha laga

jis ka ji karta hai aa jata hai wo hansta hua

kis qadar aasan mere dil ka darwaza laga

duriyan sari simaT kar aa gain dalan tak

wo pari-ruKH yak-ba-yak sine se mere aa laga

shahr ke logon ke andar thi bahut apnaiyat

go ki har chehra tha begana magar apna laga

pyar se Dali nazar jab man ke chehre ki taraf

jhurriyon se pur wo chehra kis qadar pyara laga

muddai KHush the saza-e-maut par 'tariq' magar

kyon mujhe munsif ka chehra itna afsurda laga