خوب صورت تو نہ تھا دل کش مگر چہرہ لگا

خوب صورت تو نہ تھا دل کش مگر چہرہ لگا

ماں کی آنکھوں میں جو دیکھا چاند کا ٹکڑا لگا

پہلے وہ بد رنگ سا اک کانچ کا ٹکڑا لگا

ہاتھ میں تم نے لیا تو آئنہ اچھا لگا

جس کا جی کرتا ہے آ جاتا ہے وہ ہنستا ہوا

کس قدر آسان میرے دل کا دروازہ لگا

دوریاں ساری سمٹ کر آ گئیں دالان تک

وہ پری رخ یک بیک سینے سے میرے آ لگا

شہر کے لوگوں کے اندر تھی بہت اپنائیت

گو کہ ہر چہرہ تھا بیگانہ مگر اپنا لگا

پیار سے ڈالی نظر جب ماں کے چہرے کی طرف

جھریوں سے پر وہ چہرہ کس قدر پیارا لگا

مدعی خوش تھے سزائے موت پر طارقؔ مگر

کیوں مجھے منصف کا چہرہ اتنا افسردہ لگا