KHun aankhon se nikalta hi raha

ḳhuun āñkhoñ se nikaltā hī rahā

kārvān-e-ashk chaltā hī rahā

is kaf-e-pā par tire rañg-e-hinā

jin ne dekhā haath maltā hī rahā

sub.h hote bujh ga.e saare charāġh

dāġh-e-dil tā shaam jaltā hī rahā

kab huā bekār putlā ḳhaak kā

ye to sau qālib meñ Dhaltā hī rahā

beh hue kab daaġh mere jism ke

ye shajar har vaqt phaltā hī rahā

kab thamā āñkhoñ se merī ḳhūn-e-dil

josh khā khā kar ubaltā hī rahā

kyā huā marham lagāne se 'fuġhāñ'

zaḳhm-e-dil siine meñ saltā hī rahā

KHun aankhon se nikalta hi raha

karwan-e-ashk chalta hi raha

is kaf-e-pa par tere rang-e-hina

jin ne dekha hath malta hi raha

subh hote bujh gae sare charagh

dagh-e-dil ta sham jalta hi raha

kab hua bekar putla KHak ka

ye to sau qalib mein Dhalta hi raha

beh hue kab dagh mere jism ke

ye shajar har waqt phalta hi raha

kab thama aankhon se meri KHun-e-dil

josh kha kha kar ubalta hi raha

kya hua marham lagane se 'fughan'

zaKHm-e-dil sine mein salta hi raha