KHun-bar chashm kyon na ho unwan-e-arzu

ḳhūñ-bār chashm kyoñ na ho unvān-e-ārzū

sarf-e-junūn-e-shauq hai sāmān-e-ārzū

phir dil kī hasratoñ meñ hai ummīd kī numūd

phir ho chalī hai yaas pashemān-e-ārzū

terī nigāh-e-shauq hai yā barq-e-iztirāb

terī adā-e-husn hai yā jān-e-ārzū

dil meñ vahī ḳhalish hai vahī zauq-e-jāñ-gudāz

phir chāhtā huuñ lazzat-e-paikān-e-ārzū

ye kār-nāma-e-ġham-e-ulfat jigar-ḳharāsh

likhtā hai dil ke ḳhuun se unvān-e-ārzū

pur-josh valvaloñ kā talātum hai maujzan

is muḳhtasar se dil meñ ye tūfān-e-ārzū

miTnā kisī ke ġham meñ dalīl-e-hayāt hai

kitnā hai dil-fareb ye unvān-e-ārzū

'sāqib' kisī kī yaad se rag rag meñ hai ḳhalish

pinhāñ haiñ dil meñ ḳhār-e-bayābān-e-ārzū

KHun-bar chashm kyon na ho unwan-e-arzu

sarf-e-junun-e-shauq hai saman-e-arzu

phir dil ki hasraton mein hai ummid ki numud

phir ho chali hai yas pasheman-e-arzu

teri nigah-e-shauq hai ya barq-e-iztirab

teri ada-e-husn hai ya jaan-e-arzu

dil mein wahi KHalish hai wahi zauq-e-jaan-gudaz

phir chahta hun lazzat-e-paikan-e-arzu

ye kar-nama-e-gham-e-ulfat jigar-KHarash

likhta hai dil ke KHun se unwan-e-arzu

pur-josh walwalon ka talatum hai maujzan

is muKHtasar se dil mein ye tufan-e-arzu

miTna kisi ke gham mein dalil-e-hayat hai

kitna hai dil-fareb ye unwan-e-arzu

'saqib' kisi ki yaad se rag rag mein hai KHalish

pinhan hain dil mein KHar-e-bayaban-e-arzu