KHun-chakan qalb-o-jigar chaak-gareban nikla

ḳhūñ-chakāñ qalb-o-jigar chāk-garebāñ niklā

jo tirī bazm se niklā so pareshāñ niklā

terī ik ek nazar ne kiyā sab ko ghāyal

jis ko dekhā vahī minnat-kash-e-paikāñ niklā

ġhunche bedār hue jaag uThe lāla-o-gul

bahr-e-gul-gasht jo vo rashk-e-gulistāñ niklā

jis kī guftār se thā sab ko farishte kā gumāñ

apne kirdār meñ vo sānī-e-shaitāñ niklā

ham shab-e-tār meñ bhī tere makāñ tak pahuñche

apnā har dāġh-e-jigar sham-e-farozāñ niklā

shukr hai ashk-e-nadāmat mire kaam aa hī ga.e

marhala hashr kā mere liye āsāñ niklā

baḌh ke dāman ko mire ḳhār-e-muġhīlāñ ne liyā

maiñ jo 'āzād' kabhī sū-e-bayābāñ niklā

KHun-chakan qalb-o-jigar chaak-gareban nikla

jo teri bazm se nikla so pareshan nikla

teri ek ek nazar ne kiya sab ko ghayal

jis ko dekha wahi minnat-kash-e-paikan nikla

ghunche bedar hue jag uThe lala-o-gul

bahr-e-gul-gasht jo wo rashk-e-gulistan nikla

jis ki guftar se tha sab ko farishte ka guman

apne kirdar mein wo sani-e-shaitan nikla

hum shab-e-tar mein bhi tere makan tak pahunche

apna har dagh-e-jigar sham-e-farozan nikla

shukr hai ashk-e-nadamat mere kaam aa hi gae

marhala hashr ka mere liye aasan nikla

baDh ke daman ko mere KHar-e-mughilan ne liya

main jo 'azad' kabhi su-e-bayaban nikla