خون دل جب بھی نکالا تو غزل کہہ ڈالی

خون دل جب بھی نکالا تو غزل کہہ ڈالی

ضبط جب تیرا سنبھالا تو غزل کہہ ڈالی

مدتوں تک تری یادوں پہ لگا تھا پہرا

جب ہٹا دل سے یہ جالا تو غزل کہہ ڈالی

اتنی تاریکی میں گزری ہیں ہماری راتیں

جب کہیں دیکھا اجالا تو غزل کہہ ڈالی

ہم سے مے کش پہ کھلے تب یہ نظارے سارے

جام ساقی نے اچھالا تو غزل کہہ ڈالی

جب وہ کوچے سے کبھی نکلے فقط شعر کہے

اس نے جب ہم کو نکالا تو غزل کہہ ڈالی

میں نے بس حسن و محبت پہ نہیں لکھی ہے

جب چھنا منہ سے نوالہ تو غزل کہہ ڈالی