KHun-e-tamanna rang laya ho aisa bhi ho sakta hai

ḳhūn-e-tamannā rañg laayā ho aisā bhī ho saktā hai

tanhā.ī meñ vo royā ho aisā bhī ho saktā hai

sab ke chehre par chehra thā maiñ kis ko apnā kahtā

koī mujhe bhī DhūñD rahā ho aisā bhī ho saktā hai

jis ne merā ghar luTne meñ choroñ kī aguvā.ī kī

vo merā hī ham-sāya ho aisā bhī ho saktā hai

mahfil hai añgusht-ba-dandāñ ahl-e-nazar par riqqat taarī

sher karishma kar hī gayā ho aisā bhī ho saktā hai

bhiiḌ meñ us ko maiñ ne dekhā dekh liyā thā us ne bhī

yā phir nazroñ kā dhokā ho aisā bhī ho saktā hai

daulat shohrat aanī jaanī phir is par itrānā kyā

paanī par ye naam likhā ho aisā bhī ho saktā hai

apnī kahānī jaan ke yaaro nāhaq aañkh bhigote ho

us kā ġham bhī tum jaisā ho aisā bhī ho saktā hai

vaqt kī dhuup kaḌī hai 'ġhāzī' dānāoñ kī bastī meñ

barf sā chehra sulag rahā ho aisā bhī ho saktā hai

KHun-e-tamanna rang laya ho aisa bhi ho sakta hai

tanhai mein wo roya ho aisa bhi ho sakta hai

sab ke chehre par chehra tha main kis ko apna kahta

koi mujhe bhi DhunD raha ho aisa bhi ho sakta hai

jis ne mera ghar luTne mein choron ki aguwai ki

wo mera hi ham-saya ho aisa bhi ho sakta hai

mahfil hai angusht-ba-dandan ahl-e-nazar par riqqat tari

sher karishma kar hi gaya ho aisa bhi ho sakta hai

bhiD mein us ko main ne dekha dekh liya tha us ne bhi

ya phir nazron ka dhoka ho aisa bhi ho sakta hai

daulat shohrat aani jaani phir is par itrana kya

pani par ye nam likha ho aisa bhi ho sakta hai

apni kahani jaan ke yaro nahaq aankh bhigote ho

us ka gham bhi tum jaisa ho aisa bhi ho sakta hai

waqt ki dhup kaDi hai 'ghazi' danaon ki basti mein

barf sa chehra sulag raha ho aisa bhi ho sakta hai