KHun-girafta ho to KHanjar ka badan dukhta hai

ḳhūñ-girafta ho to ḳhanjar kā badan dukhtā hai

panja-e-ḳhair meñ hī shar kā badan dukhtā hai

paikar-e-nīm-shikasta huuñ karo tesha-zanī

bārish-e-gul se ye patthar kā badan dukhtā hai

kaun hai tujh sā jo bāñTe mirī din bhar kī thakan

muzmahil raat hai bistar kā badan dukhtā hai

mustaqil shorish-e-tūfāñ se rageñ TūTtī haiñ

zabt-e-paiham se samundar kā badan dukhtā hai

zaḳhm-ḳhurda dar o dīvār kī hālat hai ajab

sirf aahaT se mire ghar kā badan dukhtā hai

qīmat-e-jāñ kī tavaqqo kaf-e-qātil se kahāñ

ḳhūñ-bahā ye hai ki ḳhanjar kā badan dukhtā hai

dard maujoñ kī rifāqat kā baḌā hai shāyad

qurb-e-sāhil se shanāvar kā badan dukhtā hai

KHun-girafta ho to KHanjar ka badan dukhta hai

panja-e-KHair mein hi shar ka badan dukhta hai

paikar-e-nim-shikasta hun karo tesha-zani

barish-e-gul se ye patthar ka badan dukhta hai

kaun hai tujh sa jo banTe meri din bhar ki thakan

muzmahil raat hai bistar ka badan dukhta hai

mustaqil shorish-e-tufan se ragen TuTti hain

zabt-e-paiham se samundar ka badan dukhta hai

zaKHm-KHurda dar o diwar ki haalat hai ajab

sirf aahaT se mere ghar ka badan dukhta hai

qimat-e-jaan ki tawaqqo kaf-e-qatil se kahan

KHun-baha ye hai ki KHanjar ka badan dukhta hai

dard maujon ki rifaqat ka baDa hai shayad

qurb-e-sahil se shanawar ka badan dukhta hai