KHun ke pyase hain wahan abru-e-KHamdar juda

ḳhuuñ ke pyāse haiñ vahāñ abrū-e-ḳhamdār judā

tez kartī hai chhurī yaañ mizha-e-yār judā

ai sanam bahr-e-ḳhudā tū na ho zinhār judā

maut hī hai jo masīhā se ho bīmār judā

ruḳh-e-raushan se hoñ kyā abrū-e-ḳhamdār judā

sub.h-e-mahshar se na hogī ye shab-e-tār judā

tū kahe to abhī sar kaaT ke rakh dete haiñ

ham kisī haal meñ tujh se nahīñ ai yaar judā

bāġh-e-ālam meñ kise ishq un āñkhoñ kā nahīñ

maiñ huuñ bīmār judā nargis-e-bīmār judā

is se kuchh ḳhauf nahīñ is se hai andesha-e-marg

ranjish-e-ḳhalq judā ranjish-e-dildār judā

ḳhaak bhī is se na ho is se ho mahshar barpā

kabk kī chaal judā yaar kī raftār judā

abhī ho jaa.e zamīñ ham-sar-e-charḳh-e-anjum

kafsh se tere sitāre hoñ jo do-chār judā

ek din vasl hī ho jā.egā āshiq kā tire

mujh se hotā hai jo ai yaar tū har baar judā

ek gul bāġh-e-jahāñ meñ nahīñ tujh sā ba-ḳhudā

sab hasīnoñ se ravish hai tirī ai yaar judā

kaun sī shakl hai ab ziist kī merī 'akbar'

sadma-e-hijr judā ta.ana-e-aġhyār judā

KHun ke pyase hain wahan abru-e-KHamdar juda

tez karti hai chhuri yan mizha-e-yar juda

ai sanam bahr-e-KHuda tu na ho zinhaar juda

maut hi hai jo masiha se ho bimar juda

ruKH-e-raushan se hon kya abru-e-KHamdar juda

subh-e-mahshar se na hogi ye shab-e-tar juda

tu kahe to abhi sar kaT ke rakh dete hain

hum kisi haal mein tujh se nahin ai yar juda

bagh-e-alam mein kise ishq un aankhon ka nahin

main hun bimar juda nargis-e-bimar juda

is se kuchh KHauf nahin is se hai andesha-e-marg

ranjish-e-KHalq juda ranjish-e-dildar juda

KHak bhi is se na ho is se ho mahshar barpa

kabk ki chaal juda yar ki raftar juda

abhi ho jae zamin ham-sar-e-charKH-e-anjum

kafsh se tere sitare hon jo do-chaar juda

ek din wasl hi ho jaega aashiq ka tere

mujh se hota hai jo ai yar tu har bar juda

ek gul bagh-e-jahan mein nahin tujh sa ba-KHuda

sab hasinon se rawish hai teri ai yar juda

kaun si shakl hai ab zist ki meri 'akbar'

sadma-e-hijr juda tana-e-aghyar juda