خون میں لپٹی ہوئی کچھ شاعری آنکھوں میں تھی

خون میں لپٹی ہوئی کچھ شاعری آنکھوں میں تھی

موت سانسوں پہ رکی تھی زندگی آنکھوں میں تھی

ابتداءً نام تیرا آ گیا ہونٹوں تلک

اور پھر ساری کی ساری ان کہی آنکھوں میں تھی

رات جب اس سے سخن کے آشیاں میں ہم ملے

برہمی افسردگی شرمندگی آنکھوں میں تھی

ایک رستہ تھا کہ جس پر ہم مسافت کر چکے

ایک منزل بے اثر بے نام سی آنکھوں میں تھی

کچھ رقابت کا بھنور تھا آشنائے موج میں

کچھ کشش اپنی مگر ان اجنبی آنکھوں میں تھی

اک دیا جلتا رہا تا دیر کوہ ہجر پر

ایک انگار وفا کی شعلگی آنکھوں میں تھی

کیا کہیں اس عالم وحدت کا ہم کاوشؔ کہ جب

روشنی خوابوں میں لیکن تیرگی آنکھوں میں تھی