KHun mein lipTi hui kuchh shairi aankhon mein thi

ḳhuun meñ lipTī huī kuchh shā'irī āñkhoñ meñ thī

maut sāñsoñ pe rukī thī zindagī āñkhoñ meñ thī

ibtidā.an naam terā aa gayā hoñToñ talak

aur phir saarī kī saarī an-kahī āñkhoñ meñ thī

raat jab us se suḳhan ke āshiyāñ meñ ham mile

barhamī afsurdagī sharmindagī āñkhoñ meñ thī

ek rasta thā ki jis par ham masāfat kar chuke

ek manzil be-asar be-nām sī āñkhoñ meñ thī

kuchh raqābat kā bhañvar thā āshnā-e-mauj meñ

kuchh kashish apnī magar un ajnabī āñkhoñ meñ thī

ik diyā jaltā rahā tā-der koh-e-hijr par

ek angār-e-vafā kī sho'lagī āñkhoñ meñ thī

kyā kaheñ us 'ālam-e-vahdat kā ham 'kāvish' ki jab

raushnī ḳhvāboñ meñ lekin tīrgī āñkhoñ meñ thī

KHun mein lipTi hui kuchh sha'iri aankhon mein thi

maut sanson pe ruki thi zindagi aankhon mein thi

ibtidaan nam tera aa gaya honTon talak

aur phir sari ki sari an-kahi aankhon mein thi

raat jab us se suKHan ke aashiyan mein hum mile

barhami afsurdagi sharmindagi aankhon mein thi

ek rasta tha ki jis par hum masafat kar chuke

ek manzil be-asar be-nam si aankhon mein thi

kuchh raqabat ka bhanwar tha aashna-e-mauj mein

kuchh kashish apni magar un ajnabi aankhon mein thi

ek diya jalta raha ta-der koh-e-hijr par

ek angar-e-wafa ki sho'lagi aankhon mein thi

kya kahen us 'alam-e-wahdat ka hum 'kawish' ki jab

raushni KHwabon mein lekin tirgi aankhon mein thi